Шурӯъ аз 26 январ дар тамоми сохторҳои давлатӣ нишастҳои матбуотӣ оғоз мешаванд

Дар тамоми вазорату идораҳо, ташкилоту муассисаҳо ва мақомоти иҷроияи ҳокимияти давлатии кишвар аз 26 январ то 13 феврал нишастҳои матбуотӣ оид ба ҷамъбасти фаъолияти соли 2025 баргузор мешаванд. Тибқи иттилои АМИТ «Ховар», ин ҷараён тамоми сохторҳои давлатӣ, аз ҷумла мақомоти Вилояти Мухтори Кӯҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои ҷумҳуриро фаро мегирад.

Нақшаи баргузории нишастҳои матбуотӣ аз ҷониби Дастгоҳи иҷроияи Президенти Ҷумҳурии Тоҷикистон тасдиқ шуда, мувофиқи он роҳбарони сохторҳои давлатӣ дар ин давра ҳисоботи солонаи худро пешниҳод намуда, ба саволҳои намояндагони воситаҳои ахбори омма посух хоҳанд дод.

Манбаъҳои иттилоотӣ, аз ҷумла Asia‑Plus, таъкид мекунанд, ки ин нишастҳо ҳамчун қисми низоми ҳисоботдиҳии даврии мақомоти давлатӣ баргузор мешаванд. Тибқи иттилои ин нашрия, чунин мулоқотҳо бо ВАО аз соли 2005 бо супориши Президенти Ҷумҳурии Тоҷикистон роҳандозӣ шуда, аз соли 2012 ба шакли ҳисоботи нимсола ӣ гузаронида мешаванд. Ҳадафи асосии онҳо «таъмини шаффофияти фаъолияти мақомоти давлатӣ ва дастрасии журналистон ба манбаъҳои расмии иттилоот» арзёбӣ мегардад.

Ҳамзамон, тибқи иттилои Asia‑Plus, дастрасии рӯзноманигорон ба мақомоти давлатӣ дар давраи миёни нишастҳо маҳдуд боқӣ мемонад ва маҳз ин нишастҳо барои бисёре аз намояндагони ВАО ягона имкони дарёфти иттилооти расмӣ аз роҳбарони сохторҳо ба ҳисоб мераванд.

Масъулони вазорату идораҳо ва ташкилоту муассисаҳо, ки дар ҳудуди шаҳри Душанбе фаъолият доранд, вақти баргузории нишастҳои худро бояд бо АМИТ «Ховар» мувофиқа намоянд, гуфта мешавад дар хабари расмӣ. Эълони макон ва вақти баргузории дар сомонаи НИАТ "Ховар" дар рӯзҳои корӣ ба забонҳои тоҷикӣ ва русӣ нашр хоҳанд шуд.

Барои дарёфти маълумоти иловагӣ рақамҳои зерини масъйлони НИАТ "Ховар" фаъоланд: 238‑54‑23, 888‑08‑34‑04, 946‑04‑00‑00.

Хадамоти мониторингии АМВАОМТ