Ба ҷавонони тоҷик истифодаи дурусти шабакаҳои иҷтимоиро меомӯзанд
26-уми апрел, дар Душанбе Форуми ҷавонон дар мавзӯи “Дарёфти роҳҳо ва абзорҳои истифодаи шабакаҳои иҷтимоӣ ба манфиатҳои миллӣ ва тарғиби арзишҳои давлатдориву давлатсозӣ” оғоз гардид.
Дар форум асосан ҷавонон ва блогерони тоҷик ширкат меварзанд ва дар бораи тарзи дуруст истифода намудан аз шабакаҳои иҷтимоӣ ҳарф мезананд.
Роҳандозии ин форум ба дӯши Кумитаи кор бо ҷавонон ва варзиш аст.
“Бо назардошти зиёд гардидани аҳамияти шабакаҳои иҷтимоӣ ва нақши истифодабарандагони он дар рушди давлату ҷомеа зарурати зиёд намудани чорабиниҳо ҷиҳати фаҳмонидани истифодаи дуруст ва оқилонаи онҳо ба миён омадааст”, - мегӯянд масъулини Кумита.
Зикр гардид, ки “дар айни замон, шабакаҳои иҷтимоӣ на танҳо бо мақсади муошират истифода карда мешаванд, балки барои пешбурди тиҷорат, инчунин барои паҳн кардани итгилооти аз ҷиҳати иҷтимоӣ муҳим фаъолона истифода мешаванд”.
Дар ин форум, баромади намояндагони Дастгоҳи иҷроияи Президенти Тоҷикистон, Кумитаи кор бо ҷавонон ва варзиш, Вазорати корҳои дохилӣ ва Кумитаи давлатии амнияти миллии Тоҷикистон пешбинӣ мешавад.
Маърузаи намояндагони Вазорати фарҳанг, Кумитаи рушди сайёҳӣ, Кумитаи ТВ ва радио, Маркази тадқиқоти стратегӣ ва Хадамоти алоқа низ дар назар аст.
Дар чорабинӣ намояндаи АМИТ “Ховар” ва Агентии иттилоотии “Азия-Плюс” низ суханронӣ хоҳанд кард.
Гуфта мешавад, ки ин форум дар доираи дастури Озода Раҳмон, роҳбари Дастгоҳи иҷроияи Президенти Тоҷикистон роҳандозӣ мегардад. Таъкид мешавад, ки дар форуми мазкур 200 блогери ҷавон ширкат меварзанд.
Форуми ҷавонон то рӯзи 30-юми апрел идома карда, пас аз Душанбе, ширкаткунандагон ба шаҳру навоҳии Айнӣ, Панҷакент, Истаравшан, Хуҷанд ва Гулистон сафар хоҳанд кард.
Ҳамин тавр, дар идомаи форум бо мақсади муаррифии имкониятҳои сайёҳии кишвар рӯзҳои 27-29-уми апрел иштирокчиён бо ширкати зиёда аз 60 блогери ҷавон аз мавзӯъҳои сайёҳиву таърихии минтақа ва дастоварҳои ҳунарҳои мардумӣ боздид мекунанд.
Ёдовар мешавем, ки Форуми ҷавонон бори нахуст аст, ки дар мавзӯи “Дарёфти роҳҳо ва абзорҳои истифодаи шабакаҳои иҷтимоӣ ба манфиатҳои миллӣ ва тарғиби арзишҳои давлатдориву давлатсозӣ” роҳандозӣ мегардад.
Сурат: Asia-Plus
