Оғози мактаби журналистӣ дар мавзӯи инъикоси ҳаводиси марзӣ
Имрӯз дар шаҳри Гулистони вилояти Суғд мактаби журналистӣ оғоз шуд.
Мактаби мазкур барои журналистоне, ки мавзӯъҳои ҳассос, бахусус баҳсҳои марзии Тоҷикистону Қирғизистонро пайгирӣ мекунанд, пешбинӣ шуда, 6 рӯз идома хоҳад ёфт. Давоми 6 рӯз коршиносон ва тренерони ботаҷриба ба монанди Раҷаб Мирзо, Абдулло Раҳнамо, Қосим Бекмуҳаммад, Неъматулло Мирсаидов, Шералӣ Ризоиён, ҳомии ҳақуқи инсон аз Руссия Борис Пантелеев ва дигарон дар масъалаҳои "Чӣ гуна бояд низоъҳои марзии Тоҷикистону Қирғизистонро инъикос намуд", " Нақши журналист дар инъикоси низоъ дар марз", "Стандартҳои байналмиллалӣ дар шароити инъикоси низоъҳо" ва дигар масъалаҳои вобаста ба пайгирии низоъҳои марзӣ суханронӣ хоҳанд кард. Инчунин Шаҳноз Комилзода, ки низои марзии охири Тоҷикистону Қирғизистонро бевосита аз ҷои ҳодиса инъикос намуд, аз таҷрибаҳои худ нақл хоҳад кард. Дар мактаб 20 нафар журналистон иштирок доранд.
Рӯзи нахуст дар назди шунавандагони ин мактаб Абдулло Раҳнамо, мудири шуъбаи муносибатҳои байналхалқии Иттифоқи нависандагони Тоҷикистонсиёсатшинос, аз таърихи низоҳои марзии Тоҷикистону Қирғизистон, мавқеи расмии ҷонибҳоро вобаста ба сарҳади давлатӣ сухан кард. Коршиноси масоили марзӣ Неъматулло Мирсаидов барои ҳозирин аз стандартҳои журналистӣ ҳангоми инъикоси мавзуоти марбут ба низоъҳо,махсусан низоҳои марзӣ дар мисоли Ҳодисаҳои байни Тоҷикистон ва Қирғизистон гуфт.
Мактаби журналистии мазкур дар доираи лоиҳаи «Инъикоси ба низоъ ҳассос ва созандаи рӯйдодҳои марзи Қирғизистону Тоҷикистон», ки аз ҷониби Вазорати федеролии хориҷии Олмон (Auswärtiges Amt) маблағгузорӣ шуда, онро АМВАОМТ дар ҳамкорӣ бо ташкилоти байналмилалии рушди ВАО-и Олмон DW Akademie амалӣ менамояд, доир мегардад.
Рухшона Ҳакимова, Хадамоти мониторингии АМВАОМТ.
