Нисбати Далери Имомалӣ ва Абдуллоҳи Ғурбатӣ парвандаҳои ҷиноятӣ боз шуданд
Рӯзноманигорон боздошт ва дар тавқифгоҳи муваққатии Раёсати ВКД дар шаҳри Душанбе нигаҳдорӣ мешаванд.
Нисбати рӯзноманигрон Далери Имомалӣ ва Абдуллоҳи Ғурбатӣ парвандаҳои ҷиноятӣ оғоз гардида, онҳо боздошт шудаанд, хабар дод ба “Азия-Плюс” Абдураҳмон Шарипов, вакили дифои Далер.
“Нисбати Далери Имомалӣ бо ду моддаи Кодекси ҷиноятии ҶТ: аз ҷониби прокуратураи шаҳри Душанбе мутобиқи моддаи 259, қисми 1 (Соҳибкории ғайриқонунӣ) ва аз ҷониби прокуратураи ноҳияи Шоҳмансур бо моддаи 346, қисми 1, банди “А” (Дидаю дониста расонидани хабари бардурӯғ) парвандаи ҷиноятӣ боз шудааст", - хабар дод адвокат.
Ба гуфтаи Абдураҳмон Шарипов, нисбати Абдуллоҳи Ғурбатӣ бар асоси аризаи корманди ШКД ноҳияи Шоҳмансур аз ҷониби прокуратураи ҳамин ноҳия бо моддаи 328, қисми 1 (Истифодаи зӯроварӣ ба муқобили намояндаи ҳокимият) парванда боз шудааст.
Айни замон ҳар ду боздоштшуда дар тавқифгоҳи муваққатии Раёсати ВКД дар шаҳри Душанбе қарор доранд.
“Далери Имомалӣ қисман ба гуноҳи худ иқрор шуда, Абдуллоҳ Ғурбатӣ, ки ба ҳайси наворбардор бо Д.Имомалӣ кор мекунад, иттиҳомро рад мекунад”, - илова намуд адвокат.
Абдуллоҳи Ғурбатӣ ба адвокат чунин гуфтааст: “Ман ягон ният ё мақсади муноқиша бо кормандони милитсияро надоштам. Маро ҷавоб доданд ва ман хостам, ки аз бино берун шавам, лекин дар назди постгоҳ бо корманди милиса дучор шудам, ки ӯ пеши роҳамро гирифт. Баъдан маро дастгир карда, ба бино ворид карданд. Пас аз он эьлон карданд, ки гӯё ман корманди милитсияро зада бошам”.
Ёдрас мекунем, ки рӯзи 4 июн Далери Имомалӣ хабар дода буд, ки аз ҷониби кормандони милитсияи ноҳияи Шоҳмансур боздошт шуд ва баъдан мавриди лату кӯб қарор гирифт.
Ӯ ҳангоми кӯшиши таҳияи гузориши видеоӣ дар браи қабули шаҳрвандон дар ҳукумати ноҳияи Шоҳмансур боздошт шуда буд.
Ба дастгирии блогер ва дигар журналистон, ки мавриди лату кӯб ва таҳқир қарор гирифтанд, ҷомеаи рӯзноманигорӣ садо баланд кард.
Раиси Ҳизби демократи Тоҷикистон Саидҷаъфар Усмонзода дар навбати худ бо дархости санҷиши мӯшикофонаи ин ҳодиса ба раиси Маҷлиси миллии Маҷлиси Олии ҷумҳурӣ Рустами Эмомалӣ муроҷиат намуд.
Ин бори аввал нест, ки Абдуллоҳ Ғурбатӣ зимни иҷрои фаъолияти касбиаш ба мушкилот дучор мешавад. Рӯзи 29 майи соли 2020 дар ноҳияи Хуросон ӯ аз ҷониби шахсони номаълум мавриди лату кӯб қарор гирифт. Ин ҷо ӯ барои таҳияи гузориш дар бораи офати табиӣ омада буд.
Се нафар ҳамлагаронро баъдан пайдо карданд (рӯзноманигор рақами мошини онҳоро аксбардорӣ намуда, ба милитсия ариза пешниҳод кард). Барои авбошӣ ҳар кадоме аз онҳо 10 нишондиҳанда барои ҳисоб (580 сомонӣ) ҷарима шуд.
Ин ҳамлаи дуюм ба журналист буд. Шоми рӯзи 11 майи ҳамон сол шахсони номаълуми ниқобпӯш Абдуллоҳ Ғурбатиро дар назди хонааш лату кӯб карданд. Он замон гунаҳкорон пайдо нашуда буданд.
