Ватандӯстӣ муҳимтарин хислати журналист аст

Воситаҳои ахбори омма (ВАО) аз замони пайдоишаш ҳамеша дар баланд бардоштани сатҳи маърифати инсонҳо саҳми арзишманд гузошта, ин рисолати худро то имрӯз идома дода истодааст. Мардум тавассути ВАО аз набзи ҷомеа ва ҷаҳон огаҳ мегарданд. Ҳамин аст, ки имрӯз кишварҳо талош бар он доранд, то ин соҳаро рушд диҳанд. Дар Тоҷикистон низ аз ибтидои солҳои соҳибистиқлолӣ ба ВАО таваҷҷуҳи махсус зоҳир мегардад. Ҳамасола ташкил шудани даҳҳо расонаи давлативу ҷамъиятиву мус-тақил далели ин гуфтаҳост.

Дар зимн доир ба вазъи имрӯзаи ВАО, рушду инкишофи он, мушкилиҳои соҳа ва ояндаи касбу ихтисоси журналистика бо Исматзода Саъдӣ, директори Академияи воситаҳои ахбори омма суҳбат намудем, ки фишурдаи он пешкаш мегардад.

- Шумо чандест, ки роҳбарии Академияи ВАО-ро ба зимма доред. Ба назари шумо ин муассиса аз соли таъсисаш то инҷониб дар рушди соҳаи журналистика чӣ саҳм гузошта тавонист?

- Вазифаи асосии Академияи ВАО баланд бардоштани сатҳи касбияти журналистон аст. Фикр мекунам, Академия дар муддати панҷ сол то ҷое ба зинаи якуми мақсадгузорӣ ноил гашта тавонист. Тибқи низомномаи Академия дар дохили он институти такмили ихтисос ба роҳ монда шудааст ва ҳар сол зиёда аз сад нафар журналист аз курсҳои такмили ихтисос гузашта истодаанд.

- Шумо эҳсос мекунед, ки имрӯз фарқгузорӣ миёни ҳамкасбони матбуоти мустақил ва давлатӣ ҳаст. Ба фикри шумо ин аз куҷо сарчашма мегирад?

- Ҷомеа тарзе сохта шудааст, ки ҳама вақт гуногунфикрӣ, гуногунандешагӣ ҳаст. Ҳар кас фикри худашро дорад. Мавқеъ ва ақидаҳои мардум ҳам гуногун мешаванд. Навобаста аз он ки рӯзномаву маҷаллаҳо давлатӣ аст ё ғайридавлатӣ, мақсад як бояд бошад. Яъне ҳамраъйии журналистӣ. Ва ин ҳамраъйӣ танҳо дар меҳвари давлат ва миллат пойбарҷо мемонад.

- Имрӯз бархе аз шаҳрвандон барои ҳалли мушкилашон аз ВАО истифода мебаранду ба қавле охирин умеди хешро барои ҳалли душворияшон аз он меҷӯянд. Чаро?

- Вақте ки шахс меравад, дарди худро ба ҳамон ниҳоде, ки марбут аст мегӯяд, масъулин барои ҳал гардонидани муаммои ӯ беэътиноӣ мекунанд, маҷбур мешавад, ба ВАО муроҷиат карда, мушкили худро ҳал кунад. Ин амалҳо аз замони пеш ҳам буд, тавассути мактубҳои беимзо ва аризаҳои шикоятӣ мардум даъвои худро иброз мекарданд. Бояд гуфт, ки ин падидаи нав нест ва имрӯз ҳам идома дорад

- Шумо замони декани факултети журналистика будан, чӣ идеяи навро барои журналистони оянда ҷорӣ карда тавонистед?

- Дар факултети журналистикаи Донишгоҳи миллии Тоҷикистон вақте омадем, беш аз 350 нафар донишҷӯ таҳсил мекард. Якумин амали мо ин кушодани сомонаи расмии факултет буд, ки имрӯз фаъолият дорад. Дар Маркази миллии тестӣ тавонистем, ки ихтисоси web - рӯзноманигориро дохил кунем ва соли аввал 25 нафар донишҷӯро ба ин ихтисос қабул намудем.

- Агар шумо дуюмбора декани факултети мазкур шавед, чӣ иқдомҳои дигарро роҳандозӣ мекардед?

- Шоир мегуяд:

Дил нест кабутар ки ба ҳар бом нишинад,
Аз гӯшаи боме ки паридем, паридем.

- Шумо ба журналистони ҷавон ҷиҳати боз ҳам дурахшонтар намудани соҳаи журналистика дар оянда чӣ маслиҳату пешниҳодҳо доред?

- Журналистони замони имрӯзаи мо бояд ватандӯст бошанд. Ин аз ҳама хислати муҳимтарини журналист аст. Бигзор ӯро таъна зананд, ки ту тарғибгар ҳастӣ, вале тарғибгари як шахс неву, балки давлат ҳастӣ, ин боиси ифтихор бояд бошад, на таъна. Онҳое фикр мекунанд, ки фақат бояд санг андозему танқид кунему бисӯзонем, журналист нестанд. Танқид дар ҳама ҷо ҳаст. Ҳама метавонад, ки аз уҳдаи танқидкунӣ барояд, аммо дида тавонистани рушди давлатдорӣ, пешравӣ ва тараққиёт, ки солҳои охир аз диди баъзе журналистони мо дур мондааст, боиси таассуф аст . Бояд журналистони оянда ин сифатҳои дар боло зикргардидаро инъикос кунанд, ки мардум ва миллати мо сипосманд бошанд. Дӯст доштани ватан, ояндабинӣ ва тарғиби ғояҳои нави рушди давлатдорӣ ин ҳама вазифаҳои асосии журналистони ҷавон мебошад.

Анушервон БАҚОЗОДА,
коромӯзи “ҶТ”

http://javonon.tj/news/social/vatand-st-mu-imtarin-khislati-zhurnalist-ast/