Маҳмадюсуф Исмоилов хабарнигори зиндонӣ озод шуд: “ба ҳаҷву танзнависӣ мегузарам”

Ин хабарнигор бори аввал соли 2010 маҳкум ва пас аз чанде озод шуда буд, ки дигарбора соли 2013 барои 11 сол маҳкум шуд.

Пас аз наздик ба 9 соли зиндон хабарнигори тоҷик Маҳмадюсуф Исмоилов, бегоҳии 16-уми апрел раҳо шуд. Ӯро моҳи октябри соли 2013 бо ҷурми "тамаъҷӯӣ" ва "қаллобӣ" 11 сол равонаи зиндон карда буданд. Исмоилов бо вуҷуди адои ҷазо, барои се соли дигар аз ҳуқуқи рӯзноманигорӣ маҳрум аст. Вале ӯ мегӯяд, тасмим дорад дар ин муддат ба фаъолияти ҳаҷву танзнависӣ бипардозад.

Маҳмадюсуф Исмоилов хабарнигори тоҷик ва зодаи ноҳияи Ашт, пас аз адои ҷазо дар муассисаи ислоҳии 3/5 шаҳри Хуҷанд озод шуд. Вай пас аз чанди лаҳзаи озод шудан дар суҳбат ба “Азия-Плюс” гуфт, ки 8 солу 10 моҳи умраш дар зиндон паси сар шуд. Вазъи саломатии хабарнигор хуб ба назар мерасид ва зоҳиран ба мисли солҳои пешин ҷасорати ҳарф задан камбду мушкилҳо дар ӯ ҳанӯз дида мешуд. Ӯ мегӯяд, аз гуфтани ҳар он чи ки барои ислоҳи камбудӣ ва пешрафти ҷомеъа аст, намеҳаросад.

“Ба рӯзноманигорон ва созмонҳои ҳимояи ҳуқуқ ва ҳар касе, ки барои ҳимояти ман бархоста қазияи маро менавиштанд сипос мегӯям. Маҳз навиштаҳои ҳамкасбон буд, ки руҳияи маро нашикастанд ва барои мубориза бурдан талош кардам. Маҳз пуштибониву навиштаи рӯзноманигорон буд, ки маро зинда нигоҳ доштанд ва аз ҷиҳати равонӣ кумаки зиёд карданд”,-гуфт Исмоилов.
Исмоиловро 24-уми июни соли 2013 бар асоси аризаи сокини ноҳияи Ашт Санавбар Аҳадова боздошт ва 28-уми октябри ҳамон сол аз руйи ду моддаи Кодекси ҷиноятӣ: 247 (тақаллубкорӣ) ва 250 (тамаъҷӯӣ) гунаҳкор дониста шуда, ба 11 соли зиндони низомаш сахт маҳкум карданд. Мақомот хабарнигорро дар тамаъҷӯӣ 100 сомонӣ гунаҳкор карданд ва ахиран зимни гузаронидани чорабиниҳои оперативӣ-ҷустуҷӯӣ бино ба иттилои ВКД ҳангоми гирифтани 400 сомонӣ боздошт шуд.

Аммо худи Маҳмадюсуф Исмоилов дар мурофиаи додгоҳии соли 2013 гуфта буд, ки худро гунаҳкор намешуморад ва аз додгоҳ хоста буд ӯро бегуноҳ эътироф намоянд. Пас аз озод шудан низ хабарнигор худро бегуноҳ ҳисобида мегӯяд, зане, ки ӯро дар гирифтани пора айбдор карда буд баъдан узр пурсидааст.

"Ҳамон зане, ки маро бо гирифтани пора айбдор кард, баъди як соли ҳукм ба ман навишт, ки маро маҷбур карданд. Ман он занро гунаҳкор ҳисоб намекунам, ӯро мақомот ба гап гирифта буданд. Дар охир пушаймон шуд. Аз руйи шуниди ман, баъдан намедонам чӣ шуд, ӯ низ зиндонӣ шудааст”,-гуфт хабарнигорӣ зиндонишуда.

Тайи ҳашт соле, ки хабарнигор дар зиндон буд, дар Тоҷикистон чаҳор бор қонуни афв қабул шуд, аммо муҳлати ҳабси Исмоилов ҳамагӣ 1 солу ҳашт моҳ кам шуда буд. Охирон бор соли 2021 бар асоси қонуни нави афв муҳлати ҳабси ин хабарнигор 3 моҳу 18 рӯз кам шуд ва интизор мерафт моҳи апрели имсол раҳо шавад.

Қаблан низ, дар охирҳои соли 2010 алайҳи Маҳмадюсуф Исмоилов баъди нашри мақолаи танқидияш бо номи “Ашт валангор мешавад” бо ҷурми “тӯҳмат, таҳқир, тамаъҷӯӣ ва маҳалгароӣ” парванда боз карда, 11 моҳ дар боздоштгоҳи муваққатӣ нигоҳ доштанд. Он сол хабарнигор бо пуштибонии созмонҳои мудофеи ҳуқуқи рузноманигорон аз боздошт раҳо шуд.

Ин хабарнигор дар гузашта дар ҳафтаномаи “Нури зиндагӣ” ва дигар нашрияҳо кор кардааст.

Ба гуфтаи хабарнигор, дар ин муддат умраш дар зиндон ба 63 расид, вале ҳамоно мехоҳад барои ободии халқу ватан ва пешрафт бояд камбудиҳо гуфта шавад.

Маҳмадюсуф Исмоилов, аз камтарин хабарнигорони тоҷике ҳаст, ки ду даъфа маҳз бо ҷурми навиштаҳояш паси панҷара нишастааст. Ӯ бо бардошҳояш аз ҳаёти зиндон мегӯяд, муносибати зиндониён хело хуб буд. “Онҳо маро ҳамчун фарҳангшинос ном мебурданду номи маро аз рӯзномаву сомонаҳо мехонданд. Фахр мекарданд, ки расонаҳо аз зиндониён гуфта меистад. Дар маҳбасхонаҳо зиндониёне низ ҳастанд, ки гуноҳе надоранд ва мехоҳам афв нисбати онҳо татбиқ гардад”, - орзу дорад хабарнигор.

Хабарнигор тасмим дорад, фурсатҳои наздик дар Душанбе ё Хуҷанд нишасти хабариие барпо кунаду перомуни ҳамаи суолҳое, ки дар фаъолияти кориву пушти миллаҳои зиндон дид ба рӯзноманигорон посух диҳад.

Маҳмадюсуф Исмоилов 18-уми июни соли 1960 дар ноҳияи Ашт зода шуда, маъюби гурӯҳи дуюм ва падари ду фарзанд мебошад. Ӯ гуфт, ки 230 сомонӣ нафақа мегирад аз ҳеҷ куҷое кӯмак пайдо намекунад, яке аз фарзандонаш ба хотири рӯзгор ба Русия ба муҳоҷират рафта меояд.
https://www.asiaplustj.info/tj/news/tajikistan/society/20220417/mamadyusuf-ismoilov-habarnigori-zindon-ozod-shud-ba-avu-tanznavis-meguzaram