Хешовандонаш ба Радиои Озодӣ гуфтанд, ки ӯ шоми 6-уми июн дар хона ва дар миёни фарзандону дигар наздиконаш ҷон додааст. Фарзандаш Аҳмад гуфт, ки Султони Ҳамад гирифтори саратони меъда буд ва тайи 8 моҳи ахир аз ин беморӣ бисёр ранҷ кашидааст.
Хабарнигори шинохтаи тоҷик дар охири солҳои 90-ум, сухангӯи Комиссияи оштии миллӣ, як ниҳоде буд, ки тарафҳои даргирро ба ҳам овард ва роҳҳои хотима додан ба ҷангу ба кишвар баргардонидани паноҳҷӯёни тоҷик аз хориҷро баррасӣ мекард.
Хабарнигори Радиои Озодӣ, ки ба хонаи Султони Ҳамад рафт мегӯяд, маросими дафни ӯ рӯзи ҷумъа 7-уми июн баргузор мешавад ва ӯро бо хоҳиши худаш дар оромгоҳи Сариосиё дар Душанбе дафн мекунанд.
Нуруллои Абдулло ҳунарпешаи тоҷик, ки дар онҷо буд ба Радиои Озодӣ гуфт: "Даргузашти Султони Ҳамад зарбае ба фарҳанг дар Тоҷикистон аст. Ӯ аз зумраи афроде буд, ки рафтораш намунаи ибрат барои ҳазорон нафар аст.
Мухтор Боқизода, хабарнигори тоҷик, аз Султони Ҳамад ба ҳайси фарде ном бурд, ки ба гуфтаи ӯ: Дар зинда нигаҳ доштани номи шахсиятҳои нотакрори тоҷик корҳои арзандае анҷом додааст."
Хилватшоҳ Маҳмуд хабарнигори дигари тоҷик гуфт, орзуи Султони Ҳамад ин будааст, ки навиштану таҳқиқро идома бидиҳад, вале марг ба ӯ иҷоза надод.
Султони Ҳамад, ки солҳои 1992 то 1997 ҳамроҳ бо даҳҳо ҳазор паноҳандаи тоҷик дар Афғонистон зистааст, соли 2004 ҳамчун хабарнигори Радиои Озодӣ ба ин кишвар сафар кард ва наздик ба як сол аз он ҷо гузориш медод. Ӯ бо бисёре аз раҳбарону сиёсатмадорони Афғонистон, аз ҷумла президент Бурҳонуддини Раббонӣ, Қаҳрамони Миллии Афғонистон Аҳмадшоҳи Масъуд, ҳамсангарони ӯ Муаҳммадфаҳими Қасим, Абдуллоҳ Абдуллоҳ ва дигарон аз наздик ошно буд.
Моҳи феврали соли 2005 ӯ дар раҳоии ду афсари нерӯҳои марзбонии Тоҷикистон, ки аз тарафи қочоқбарон рабуда шуданд, саҳм гирифт. Вай ҳамчунин дар моҳи апрели ҳамон сол сафари расмии серӯзаи раиси ҷумҳури Тоҷикистон Эмомалӣ Раҳмонро ба Афғонистон ба гунаи муваффақ бозтоб дод. Ӯ дар маросиме ҳузур пайдо кард, ки дар он шоҳи собиқи Афғонистон Муҳаммад Зоҳиршоҳ ба Эмомалӣ Раҳмон нишонаи "Аҳмадшоҳи Масъуд"-ро ҳамчун рамзи сипос аз мардуми Афғонистон тақдим намуд.
Пас аз поёни давраи корияш дар Афғонистон Султони Ҳамад ба Душанбе бозгашт ва муддате шореҳу коршиноси Радиои Озодӣ буда, дертар торнамои иттилоотию фарҳангии “Рӯзгор”-ро бунёд гузошт ва ҳам машғули корҳои фарҳангӣ шуд.
Нахустин корҳои фарҳангияш низ дар Радиои Озодӣ пахш шуда, ӯ беш аз ҳама ба таҳқиқи осори ҳунарии Аҳмад Зоҳир, овозхони маъруфи Шарқ машғул гашт. Натиҷаи ин ҷустуҷӯҳо сегонае шуд дар бораи зиндагӣ, ҳунар ва мероси Аҳмад Зоҳир аст, ки аз соли 2005 ба ин сӯ зери унвони "Султони қалбҳо", "Пайванди Аҳмад Зоҳир бо Мавлавӣ" ва "Аҳмад Зоҳир ва мусиқии Ғарб" мунташир гашт.
https://www.ozodi.org/a/tajik-journalist-passed-away/29984828.html
